"БІР ДОСЫМ БАР"
Бір досым бар, ойып салар төбемді,
Бір досым бар, жамандығы жоқ енді,
Бір досым бар, ақшасы көп, атақты,
Бір досым бар, қор боп жүрген өнерлі.
Бір досым бар, сөздерімен жылатқан,
Бір досым бар, көздерінен мұң аққан.
Бір досым бар, өз тағдырын жек көрген,
Бір досым бар, өз өмірін ұнатқан.
Бір досым бар, бағы мәңгі байланған,
Бір досым бар, қуып жүрген қайғы арман.
Бір досым бар, мейірімді, иманды,
Бір досым бар, тас жүрекке айналған.
Бір досым бар, күндіз-түні қаңғырған.
Бір досым бар, көңілімді қалдырған.
Бір досым бар, іздегенде таппайтын,
Бір досым бар, күліп шығар алдымнан.
Бір досым бар, нұрландырған санамды,
Бір досым бар, жыртып кеткен жағамды.
Бір досым бар, аялайтын барлығын,
Бір досым бар, аямайтын адамды
Бір досым бар, мені ғана жақтайтын,
Бір досым бар, өзін-өзі ақтайтын.
Бір досым бар, бәрін біліп тұратын,
Бір досым бар, еш нәрсені қақпайтын.
Бір досым бар, жұртты аузына қаратқан,
Бір досым бар, төбеттерге талатқан.
Бір досым бар, темекі де шекпейтін,
Бір досым бар, қолы тимес арақтан.
Бір досым бар, еңсемді ылғы тіктейтін.
Бір досым бар, өтірігі бітпейтін.
Бір досым бар, сағынатын әрдәйім,
Бір досым бар, мені ешқашан күтпейтін.
Бір досым бар, білмейтұғын шамасын,
Бір досым бар, жаны ашитын жанашыр,
Бір досым бар, көкке жеткен әке деп,
Бір досым бар өкпелеткен анасын.
Бір досым бар, алға қарай ұмтылған.
Бір досым бар, жігірімді құм қылған.
Бір досым бар іштей ғана сыйлайтын,
Бір досым бар, өсектейтін сыртымнан.
Бір досым бар, алдап қана сынайтын,
Бір досым бар, көмегімді сұрайтын.
Бір досым бар, аяғымнан шалатын,
Бір досым бар, мен өлгенде жылайтын
